ឆ្នាំ 2022 សៀមរាប សាងសង់រួចរាល់ ផ្លាស់ប្តូររូបរាងថ្មី និងកំពុងចម្រើនលូតលាស់!

ចែករំលែកអត្ថបទនេះ  

ទីក្រុងសៀមរាបជាបេះដូងនៃវិស័យទេសចរណ៍ក្នុងប្រទេសកម្ពុជា ដោយមានតំបន់ និងរបស់គួរឱ្យចាប់អារម្មណ៍ជាច្រើនផ្តល់ជូនអ្នកក្នុងស្រុក ក៏ដូចជាភ្ញៀវទេសចរ។ មិនត្រឹមតែមានភាពសម្បូរបែបនៃសកម្មភាពវប្បធម៌ និងទីតាំងស្ថាបត្យកម្មប៉ុណ្ណោះទេ អាជីវកម្មនៅទីនេះក៏រីកចម្រើនជារៀងរាល់ឆ្នាំផងដែរ! បន្ទាប់ពីរាជធានីភ្នំពេញដែលជាតំបន់សកម្មភាពសេដ្ឋកិច្ច សៀមរាបកំពុងអភិវឌ្ឍអគារអចលនទ្រព្យដែលធ្វើឱ្យខេត្តនេះនឹងខិតទៅរកភាពប្រសើរជាងក្នុងពេលឆាប់ៗនេះ។ 

ដើម្បីជ្រាបកាន់តែច្បាស់អំពីការអភិវឌ្ឍន៍អចលនទ្រព្យថ្មីៗក្នុងខេត្តសៀមរាប ដែលធ្វើឱ្យជីវិតកាន់តែមានភាពងាយស្រួល សូមអានព័ត៌មានខាងក្រោម៖

គម្រោងមន្ទីរពេទ្យបង្អែកខេត្តសៀមរាបថ្មី

មន្ទីរពេទ្យបង្អែកខេត្តសៀមរាបថ្មី កំពុងត្រូវបានបង្កើតឡើង ដើម្បីធ្វើឱ្យការថែទាំសុខភាពកាន់តែងាយស្រួលដល់ប្រជាពលរដ្ឋ និងផ្តល់សេវាគុណភាពខ្ពស់។ ជាអគារបួនជាន់ដែលនឹងមានគ្រែចំនួន 220 សម្រាប់អ្នកជំងឺ។ មន្ទីរពេទ្យនេះក៏នឹងមានបន្ទប់សង្គ្រោះបន្ទាន់ និងអាចផ្តល់សេវាវះកាត់ឯកទេសផងដែរ។

គម្រោងអចលនទ្រព្យនេះត្រូវបានប្រើប្រាស់ជំនួយមូលនិធិចំនួន 19 លានដុល្លារ ដែលផ្តល់ដោយទីភ្នាក់ងារសហប្រតិបត្តិការអន្តរជាតិជប៉ុន (JICA)។ មន្ទីរពេទ្យនេះត្រូវបានគេរំពឹងថានឹងបញ្ចប់ការសាងសង់ និងអាចចាប់ផ្តើមផ្តល់សេវាកម្មបាននៅចុងឆ្នាំ 2023។ គិតត្រឹមខែធ្នូ ឆ្នាំ 2021 គម្រោងនេះមានពិធីបើកការដ្ឋានសាងសង់រួចហើយ ដែលដឹកនាំដោយប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត គ្រួស សារ៉ាត់ និងលោក Kamei Haruko ជាប្រធានតំណាងការិយាល័យ JICA កម្ពុជា។

គម្រោងហេដ្ឋារចនាសម្ព័ន្ធផ្លូវ 38 ខ្សែ

គម្រោងផ្លូវ 38​ ខ្សែភ្ជាប់ប្រព័ន្ធផ្លូវធំៗជាមួយផ្លូវចំនួន 38​ នៃសង្កាត់ទាំង 12 ក្នុងខេត្តសៀមរាប ដើម្បីជួយសម្រួលចរាចរណ៍ និងធ្វើឱ្យមានសុវត្ថិភាពក្នុងការធ្វើដំណើរ។ ក្រៅ​ពី​ធ្វើ​ឱ្យ​​កាន់​តែ​មានភាពងាយ​ស្រួល និង​សុវត្ថិភាព​ក្នុង​ការ​ធ្វើ​ដំណើរ​ដោយ​យានយន្ត គម្រោង​នេះ​ក៏​នឹង​ផ្តល់​កន្លែង​សម្រាប់​អ្នកដំណើរ​ថ្មើរ​ជើង​ដោយ​បន្ថែម​ផ្លាក​សញ្ញា​ផ្លូវ​សុវត្ថិភាព ចិញ្ចើម​ផ្លូវ និង​ជា​ច្រើន​ទៀត។ បន្ថែម​ពី​នេះ ចិញ្ចើម​ផ្លូវ​តាម​ដង​ស្ទឹង​សៀមរាប ក៏​នឹង​ត្រូវ​កែ​លម្អ​ផង​ដែរ។

គម្រោងនេះដឹកនាំដោយក្រសួងសាធារណការ និងដឹកជញ្ជូន (MPWT) ដែលបានចាប់ផ្តើមកាលពីថ្ងៃទី 30 ខែវិច្ឆិកា ឆ្នាំ 2020។ មានថវិកាចំនួន 140 លានដុល្លារសម្រាប់តភ្ជាប់ផ្លូវចំនួន 38 និងថវិកាបន្ថែមចំនួន 9 លានដុល្លារទៀតដើម្បីកែលម្អប្រព័ន្ធលូ និងប្រព័ន្ធទឹកភ្លៀង។

គិតត្រឹមខែធ្នូ ឆ្នាំ 2021 គម្រោងនេះត្រូវបានរួចរាល់បាន 92.72% ហើយ ក៏រំពឹងថានឹងបញ្ចប់នៅចុងឆ្នាំនេះផងដែរ។

ផ្លូវល្បឿនលឿនថ្មី សៀមរាប - បាត់ដំបង

គម្រោងផ្លូវល្បឿនលឿនពីសៀមរាបទៅបាត់ដំបងទើបតែត្រូវបានអនុម័តដើម្បីតភ្ជាប់ និងធ្វើឱ្យមានភាពងាយស្រួលក្នុងការធ្វើដំណើរយ៉ាងលឿនរវាងខេត្តទាំងពីរនេះ។ គម្រោង​នេះ​នឹង​តភ្ជាប់ផ្លូវ​ 69​ គីឡូម៉ែត្រ​ជាមួយគ្នា មិន​ត្រឹម​តែ​ខេត្តសៀមរាប និង​បាត់ដំបង​ប៉ុណ្ណោះ​ទេ ប៉ុន្តែ​ក៏មាន​ខេត្តបន្ទាយមានជ័យ​ផងដែរ។

កិច្ចសហការស្រាវជ្រាវរវាងក្រសួងសាធារណការ និងដឹកជញ្ជូន និងក្រុមហ៊ុនសាជីវកម្មស្ពាន និងថ្នល់ចិនបានបង្ហាញថា គម្រោងនេះគឺចាំបាច់ ហើយអាចចាប់ផ្តើមសាងសង់នៅឆ្នាំ 2025។ យ៉ាងណាក៏ដោយ បើតាមឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន គម្រោងនេះអាចចាប់ផ្តើមសាងសង់នៅឆ្នាំ 2023 ឬ 2024 ដោយអាស្រ័យលើថវិកាដែលមិនទាន់បានកំណត់។

គម្រោង​ពង្រីក​ផ្លូវជាតិ​លេខ​ 6 ពីស្គន់ដល់ខេត្តសៀមរាប

គម្រោង​ពង្រីក​ផ្លូវជាតិ​លេខ​ 6 ​ពី​ក្រុង​ស្គន់​ទៅ​ខេត្ត​សៀមរាប​ជា​បួន​គន្លង​ត្រូវ​បាន​អនុម័ត​ដោយក្រសួងសាធារណការ និងដឹកជញ្ជូន។ ដោយថវិការបស់គម្រោងមិនទាន់ត្រូវបានកំណត់នៅឡើយ គម្រោងនេះត្រូវបានគេរំពឹងថានឹងជួយធ្វើឱ្យការធ្វើដំណើរកាន់តែងាយស្រួលទៅវិញទីមករវាងខេត្តសៀមរាប និងស្គន់។ 

បច្ចុប្បន្ន ប្រធានក្រសួងសាធារណការ និងដឹកជញ្ជូន ឯកឧត្ដម ស៊ុន ចាន់ថុល បានបញ្ជាក់ថា គម្រោងនេះកំពុងបន្តសិក្សាបន្ថែមទៀត។ លើសពីនេះ នៅពេលដែលគម្រោងនេះត្រូវបានដាក់ឱ្យដំណើរការ ការសាងសង់នឹងធ្វើឡើងជាពីរដំណាក់កាល ដោយផ្នែកស្គន់ដល់កំពង់ធំ នឹងពង្រីកពីពីរទៅបួនគន្លង។ ដំណាក់​កាល​មួយទៀត​ដំណើរការ​​ពី​ខេត្ត​កំពង់​ធំ​ទៅ​ខេត្ត​សៀមរាប​នឹងពង្រីក​​បួន​គន្លង។

គម្រោង​ពង្រីក​ផ្លូវជាតិ​លេខ​ 6 ពីសណ្ឋាគារសុខា ដល់អាកាសយានដ្ឋាន

គម្រោងពង្រីកផ្លូវជាតិលេខ 6 ដែលចាប់ផ្តើមពីសណ្ឋាគារសុខា ដល់ចំណុចប្រសព្វប្រលានយន្តហោះ នឹងធ្វើឱ្យមានភាពងាយស្រួលក្នុងការធ្វើដំណើរ និងជួយកាត់បន្ថយការកកស្ទះចរាចរណ៍នៅតំបន់ទាំងនោះ។ ផ្លូវនេះត្រូវបានពង្រីកជាប្រាំមួយឆ្លង 5.8 គីឡូម៉ែត្រតភ្ជាប់សណ្ឋាគារទៅចំណុចប្រសព្វ។ គម្រោង​នេះ​ត្រូវ​បាន​ផ្តល់​មូលនិធិ​ដោយ​មាន​ជំនួយ​កម្ចី​ពី​ធនាគារ​អភិវឌ្ឍន៍​អាស៊ី (ADB)។ គិតត្រឹមខែមិថុនា ឆ្នាំ 2021 គម្រោងនេះបានរួចរាល់បាន 50% ហើយ។

អាកាសយានដ្ឋានសៀមរាបថ្មី 

អាកាសយានដ្ឋាន​សៀមរាប​ថ្មី​​កំពុង​សាងសង់​នៅ​ឃុំតាយ៉ែក ស្រុក​សូទ្រនិគម។ អាកាសយានដ្ឋាននេះនឹងធ្វើឱ្យការធ្វើដំណើរទៅ និងមកខេត្តសៀមរាបមានភាពងាយស្រួលជាងមុន ដោយសារវាត្រូវបានគេរំពឹងថានឹងអាចផ្ទុកអ្នកដំណើរបាន 10 លាននាក់នៅឆ្នាំ 2030 និង 20 លាននាក់នៅឆ្នាំ 2050។

គម្រោងនេះត្រូវបានអនុម័តដោយរដ្ឋាភិបាល ដោយមានជំនួយពីក្រុមហ៊ុន យូនណាន អ៊ីនវេសមេន ហូលឌីង ក្នុងខែតុលា ឆ្នាំ 2017 ។ អាកាសយានដ្ឋានខេត្តសៀមរាបថ្មីនេះ ត្រូវបានគេរំពឹងថានឹងបញ្ចប់នៅឆ្នាំ 2023។ លើសពីនេះ បើយោងតាមប្រធានក្រុមហ៊ុន អាកាសយានដ្ឋានអន្តរជាតិសៀមរាបអង្គរថ្មី (AIAI)នៅកម្ពុជា លោក Lu Wei ត្រូវបានរំពឹងថា ព្រលានយន្តហោះនេះនឹងសម្រេចបាន 67% នៅចុងឆ្នាំ 2021។

ជលវប្បដ្ឋានក្រុងអង្គរ និងអាណាចក្រជម្រកសត្វ

សួនសត្វព្រៃ និងអាងចិញ្ចឹមត្រីថ្មីដែលមានឈ្មោះថា ជលវប្បដ្ឋានក្រុងអង្គរ និងអាណាចក្រជម្រកសត្វ គឺជាគម្រោងមួយដែលត្រូវបានរចនាឡើងដើម្បីជាកន្លែងកំសាន្ត និងទាក់ទាញមួយក្នុងខេត្តសៀមរាប។ គម្រោងនេះដឹកនាំដោយក្រុមហ៊ុន អង្គរ វ៉ាយដ៍ឡាយហ្វ៍ និង អឺឃ្វារៀម ជាមួយនឹងថវិកាចំនួន 18 លានដុល្លារសម្រាប់ការសាងសង់ដំណាក់កាលទីមួយ និង 52 លានដុល្លារសម្រាប់ដំណាក់កាលទីពីរ និងទីបី។ គម្រោង​នេះ​ត្រូវ​បាន​គេ​រំពឹង​ថា​នឹង​បើក​ជា​សាធារណៈ​នៅ​ឆ្នាំ​ 2022។

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។

en_USEN