របៀបរក្សាសុវត្ថិភាពពីគ្រោះថ្នាក់អគ្គីសនីនៅផ្ទះ

ចែករំលែកអត្ថបទនេះ  

ផ្ទះមិនមែនជាផ្ទះពេញលេញទេ ប្រសិនបើគ្រប់បន្ទប់នៃផ្ទះមិនបានតុបតែងដោយឧបករណ៍អគ្គិសនីដើម្បីធ្វើឱ្យការរស់នៅកាន់តែងាយស្រួល។ ជាការពិតទៅ វាបានក្លាយជាកត្តាចាំបាច់មួយក្នុងការរស់នៅបែបទំនើបដោយសារវាអាចធ្វើឱ្យការងារសម្រេចបានយ៉ាងស្រួលប្រសិនបើអ្នកមានឧបករណ៍ត្រឹមត្រូវសម្រាប់វា។ ទោះបីជាគ្រឿងអគ្គិសនីមានគុណសម្បត្តិជាច្រើនក៏ដោយ បើសិនប្រើប្រាស់ឧបករណ៍បែបនេះក្នុងផ្ទះច្រើនពេក និងការមិនមានការថែទាំឱ្យបានល្អ និងត្រឹមត្រូវអាចបណ្តាលឱ្យមានគ្រោះថ្នាក់ផងដែរ។

តោះ! មកស្វែងយល់ពី គន្លឹះសុវត្ថិភាព ដើម្បីបង្ការគ្រោះថ្នាក់អគ្គិសនីនៅផ្ទះខាងក្រោមនេះ។

ផលអាក្រក់នៃការឆក់អគ្គិសនី

គ្រោះថ្នាក់ដែលបង្ករដោយអគ្គិសនីដំណើរការខុសប្រក្រតីដល់រាងកាយរបស់យើងគឺធ្ងន់ធ្ងរណាស់។ ខ្លះអាចនាំទៅរកការខូចខាតជាច្រើន ហើយអាចបណ្តាលឱ្យមានគ្រោះថ្នាក់ដល់រាងកាយធ្ងន់ធ្ងរដូចខាងក្រោម៖

  1. អាចបណ្តាលឱ្យខូចខាតសរីរាង្គខាងក្នុង
  2. អគ្គីភ័យ
  3. ជំងឺចង្វាក់បេះដូងលោតញាប់
  4. ការឈឺចាប់ និងកន្ត្រាក់នៃសាច់ដុំ
  5. គាំងបេះដូង
  6. ជំងឺប្រកាច់
  7. បាត់បង់ជីវិត

គន្លឹះដើម្បីរក្សាសុវត្ថិភាពពីគ្រោះថ្នាក់អគ្គិសនី

1. ប្រយ័ត្នចំពោះការប្រើប្រាស់ព្រីភ្លើង

នៅពេលដែលអ្នកមានឧបករណ៍ប្រើប្រាស់ច្រើន ប្រាកដជាជៀសមិនផុតពីការដោតវាទៅនឹងព្រីតែមួយ។ ទោះយ៉ាងណាក៏ដោយ នេះជាអ្វីដែលអ្នកគួរបញ្ឈប់ធ្វើ។ មិនថាជញ្ជាំងរបស់អ្នកមានខ្សែភ្ជាប់ ឬព្រីច្រើនប៉ុណ្ណាដែលអាចប្រើបានក៏ដោយ ក៏មិនមានន័យថាអ្នកត្រូវប្រើវាទាំងអស់ឡើយ។ ការដោតប្រើប្រាស់លើសចំណុះអាចមានហានិភ័យដែលនាំឱ្យឡើងកំដៅខ្លាំង និងអាចបណ្តាលឱ្យឆាបឆេះ។

ព្រឺអគ្គិសនី​ដែល​ប្រើប្រាស់​លើស​កម្លាំង​អាចបណ្តាលឱ្យ​ឡើង​កំដៅ​ដោយសារ​វា​បញ្ជូន​ចរន្ត​អគ្គិសនី​ច្រើនពេក​ដើម្បី​ដំណើរការ​ឧបករណ៍​ដែល​អ្នក​ចង់ប្រើប្រាស់។ នៅពេលដំណើរការ វា​នឹង​បង្កើត​កំដៅ​ក្នុង​បរិមាណ​ច្រើន​រហូត​ដល់​មាន​ភ្លើង ដូច្នេះអ្នក​ត្រូវ​ចេះប្រើប្រាស់​ព្រីរបស់អ្នក​ដោយ​ឆ្លាតវៃ។ លើសពីនេះ ប្រសិនបើអ្នកមានឧបករណ៍ដូចជាទូទឹកកកដែលទាមទារថាមពលវ៉ាត់ខ្ពស់ដើម្បីដំណើរការ សូមប្រាកដថាអ្នកញែកដុំដោតរបស់វាចេញពីព្រីផ្សេងទៀត ដោយសារវានឹងឡើងកំដៅយ៉ាងលឿន។

2. ឧស្សាហ៍ពិនិត្យខ្សែភ្លើងរបស់អ្នក

ក្រៅ​ពី​​ប្រុង​ប្រយ័ត្ន​ចំពោះ​កន្លែង​ព្រីដែល​ឧបករណ៍​របស់​អ្នក​​បាន​ដោត សូម​ប្រាកដ​ថា​ត្រូវ​ពិនិត្យ​ខ្សែ​ភ្លើង​របស់​អ្នក​ជានិច្ចផងដែរ។ ប្រសិនបើអ្នកមានខ្សែដែលខូច ឬប្រេះ សូមប្តូរវាភ្លាមៗព្រោះវាអាចបណ្តាលឱ្យមានគ្រោះថ្នាក់ឆក់ជាដើម។

3. ប្រុងប្រយ័ត្នចំពោះទឹកនៅជុំវិញឧបករណ៍អគ្គិសនី

ពិនិត្យមើលឧបករណ៍ដែលអ្នកប្រើប្រាស់ប្រយ័ត្នចំពោះទឹកជៀសវាងពីការកំពប់នៅជិតវាព្រោះវាអាចធ្វើឱ្យមានការឆក់អគ្គិសនី ជាពិសេសប្រសិនបើឧបករណ៍របស់អ្នកមានបញ្ហាខ្សែភ្លើងដាច់ ឬរបក។ ប្រសិនបើអ្នកឃើញខ្សែដែលខូចនៅក្នុងទឹក សូមដកព្រីឧបករណ៍ចេញ រង់ចាំឱ្យទឹកស្ងួត ដូច្នេះអ្នកមានសុវត្ថិភាព និងមិនមានការឆក់។

4. ដកខ្សែចេញបន្ទាប់ពីអ្នកប្រើប្រាស់រួចតាមដែលអាចធ្វើបាន

ការដកឧបករណ៍របស់អ្នកនៅពេលអ្នកមិនប្រើវា មិនត្រឹមតែមិនប៉ះពាល់ដល់បរិស្ថានប៉ុណ្ណោះទេ វាកាន់តែមានសុវត្ថិភាពសម្រាប់អ្នកផងដែរ។ អ្នកមិនចាំបាច់ព្រួយបារម្ភអំពីពេលដាច់ចរន្តអគ្គិសនី ការឆាបឆេះ ឬអ្វីផ្សេងទៀត។ លើសពីនេះអាចធ្វើឱ្យឧបករណ៍របស់អ្នកប្រើប្រាស់បានយូរ។

5. ពិនិត្យមើលថាមពលកម្លាំងអគ្គិសនី

មុននឹងដោតឧបករណ៍ថ្មី សូមពិនិត្យមើលថាមពលកម្លាំងរបស់វាជាមុនសិន។ នេះ​គឺ​ដើម្បី​ការពារ​ការ​ឡើង​កម្ដៅ​របស់​ឧបករណ៍ ឬ​បញ្ហា​អគ្គិសនី​ផ្សេង​ទៀត​ក្នុង​ករណី​ដែល​អ្នក​ប្រើ​ខុស។ 

6. សម្អាតកង្ហាបញ្ចេញផ្សែង ឬចំហាយដែលអ្នកមាន

នៅពេលដែលកង្ហាបញ្ចេញចំហាយប្រើប្រាស់ក្នុងរយៈពេលយូរ វានឹងមានធូលីដី និងធ្វើឱ្យកង្ហារបង្វិលក្នុងល្បឿនមិនត្រឹមត្រូវដូចមុន។ ម្យ៉ាងទៀត វាបណ្តាលឱ្យឡើងកំដៅខ្លាំង និងអាចបង្កជាគ្រោះថ្នាក់អគ្គិសនី ដូច្នេះត្រូវប្រាកដថា សម្អាតកង្ហារនោះឱ្យបានទៀងទាត់បើសិនជាអ្នកមាន។

7. បង្ការឧបករណ៍ប្រើប្រាស់របស់អ្នកពីការឡើងកម្តៅ

ដោយ​ឧបករណ៍ប្រើប្រាស់​ទំនោរជា​ក្តៅ​ដោយសារ​ចរន្ត​អគ្គិសនី​ដែល​វា​ដំណើរការ នោះ​វានឹងមាន​កម្ដៅ​ខ្លាំង។ ត្រូវប្រាកដថាមានចរន្តខ្យល់ត្រឹមត្រូវសម្រាប់ឧបករណ៍ទាំងអស់របស់អ្នក ដើម្បីធានាថាវាមិនក្តៅខ្លាំងពេក។

8. ការត្រួតពិនិត្យសៀគ្វីអគ្គិសនីជាប្រចាំ

អ្នកត្រូវឈានមុខជាមួយបញ្ហាដែលអាចនឹងកើតមាន ដោយអ្នកត្រូវប្រាកដថាអ្នកដឹងពីតំបន់នៅក្នុងផ្ទះរបស់អ្នកដែលអាចមានគ្រោះថ្នាក់អគ្គីភ័យ។ ការជួលអ្នកជំនាញដើម្បីពិនិត្យមើលសៀគ្វីអគ្គិសនី ឬអ្វីផ្សេងទៀតគឺជាវិធានការដ៏ល្អមួយព្រោះពួកគេដឹងពីអ្វីដែលត្រូវប្រុងប្រយ័ត្ន និងរបៀបធានាសុវត្ថិភាពរបស់អ្នកពីគ្រោះថ្នាក់អគ្គិសនី។

តើ​ត្រូវ​ធ្វើ​យ៉ាង​ណា​ក្នុង​ករណី​ឆ្លង​ចរន្តអគ្គិសនី?

ដោយសារមិនអាចធានាបានពីសុវត្ថិភាពរហូតនោះ អ្នកត្រូវដឹងពីអ្វីដែលអ្នកត្រូវធ្វើ ក្នុងករណីដែលអ្នក ឬនរណាម្នាក់ផ្សេងទៀតត្រូវបានឆក់។ សូមមើលគន្លឹះសំខាន់ដែលអ្នកត្រូវដឹង និងចងចាំ៖

1. ដកខ្សែចរន្ត ឬបិទឧបករណ៍

ដំបូងគឺអ្នកត្រូវដកឬបិទឧបករណ៍ដែលបណ្តាលឱ្យឆក់សិន។ ការ​ធ្វើ​បែប​នេះ​ភ្លាម​ៗអាចជួយ​សង្គ្រោះ​អ្នក​ពី​ការ​ឆក់​ចរន្ត​អគ្គិសនីកាន់តែធ្ងន់ធ្ងរ ការគាំង​បេះដូង ប្រកាច់ ឬ​អាច​ស្លាប់។

2. កុំប៉ះពាល់អ្នករបួស 

ប្រសិនបើនរណាម្នាក់ត្រូវបានឆក់ សូមកុំប៉ះអ្នកនោះ ជាពិសេសប្រសិនបើអ្នកមិនទាន់បានដកឧបករណ៍ ឬផ្លាស់ទីពួកវាឱ្យឆ្ងាយពីកន្លែងដែលវាកើតឡើង។ នេះ​គឺ​ដើម្បី​ការពារ​អ្នក​ពី​ការ​ឆ្លងឆក់​ផង​ដែរ​។

3. ទៅមន្ទីរពេទ្យដើម្បីពិនិត្យ

មិនថាអ្នករងរបួសដោយសារការឆក់ខ្សែភ្លើងមានគ្រោះថ្នាក់ស្រាលឬអត់នោះទេ គួរតែទៅមន្ទីរពេទ្យដើម្បីពិនិត្យ។ ជាជាងប្រថុយនឹងការរងរបួសខាងក្នុងដែលអាចកើតមាន ឬអ្វីដែលមិនអាចមើលឃើញភ្លាមៗបន្ទាប់ពីការឆក់អគ្គិសនី ការទទួលបានការពិនិត្យពេញលេញពីវេជ្ជបណ្ឌិតដើម្បីកំណត់ស្ថានភាពគឺជារឿងប្រសើរបំផុត។ 

រក្សាផ្ទះរបស់អ្នកឱ្យក្លាយជាកន្លែងដែលមានសុវត្ថិភាព

ការរៀបចំតុបតែងផ្ទះរបស់អ្នកជាមួយនឹងអ្វីដែលអ្នកត្រូវការ និងចង់បានគឺជារឿងដែលប្រសើរណាស់ ប៉ុន្តែអ្នកមិនគួរប្រថុយសុវត្ថិភាពរបស់អ្នកដោយមើលរំលងកត្តាសំខាន់ៗដូចជាគ្រោះថ្នាក់អគ្គិសនីដែលអាចកើតមាននោះទេ។ ត្រូវប្រាកដថាផ្ទះរបស់អ្នកមិនមានខ្សែភ្លើងដែលខូចខុសប្រក្រតី ឬការប្រើប្រាស់លើសកម្រិត ដើម្បីរក្សាផ្ទះរបស់អ្នកឱ្យមានសុវត្ថិភាព។ សូមពិនិត្យមើលផ្ទះរបស់លោកអ្នកឥឡូវនេះ ដើម្បីរស់នៅក្នុងជីវិតមួយដែលមានសុវត្ថិភាព និងប្រកបដោយផាសុកភាព។

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។

en_USEN