សម្រាប់ម្ចាស់អចលនទ្រព្យ៖ ស្វែងយល់អំពីការចុះឈ្មោះនៅក្នុងប្រព័ន្ធគ្រប់គ្រងវត្តមានជនបរទេស FPCS

ព័ត៌មានបច្ចុប្បន្នភាពបន្ទាន់ ២០២៥ សម្រាប់ម្ចាស់អចលនទ្រព្យអំពីការអនុលោមពាក់ព័ន្ធទៅនឹងប្រព័ន្ធ FPCS (Foreigners Present in Cambodia System - ប្រព័ន្ធគ្រប់គ្រងវត្តមានជនបរទេសនៅកម្ពុជា)៖ 

កម្មវិធី FPCS ត្រូវបានធ្វើបច្ចុប្បន្នភាពម្តងទៀត ហើយមានការផ្លាស់ប្តូរនូវលក្ខខណ្ឌថ្មី។ យោងតាមអាជ្ញាធរ ម្ចាស់អចលនទ្រព្យទាំងអស់ដែលមានជនបរទេសស្នាក់នៅក្នុងអចលនទ្រព្យរបស់ខ្លួន ត្រូវចុះបញ្ជីអចលនទ្រព្យ និងចុះបញ្ជីជនបរទេសនៅក្នុងប្រព័ន្ធ FPCS មុនថ្ងៃទី ២១ ខែកុម្ភៈ ឆ្នាំ ២០២៥។ ក្នុងករណីមិនអនុវត្តតាម នឹងត្រូវរងការផាកពិន័យចំនួន ៣០,០០០ រៀលក្នុងជនបរទេសម្នាក់។

ម្ចាស់អចលនទ្រព្យណាដែលមានជនបរទេសជាអ្នកជួល និងមិនទាន់បានចុះបញ្ជី ត្រូវទាក់ទងទៅប៉ុស្តិ៍នគរបាលឃុំ-សង្កាត់ក្នុងតំបន់ដើម្បីរៀបចំការចុះបញ្ជីមុនពេលកំណត់។ មិនថាម្ចាស់អចលនទ្រព្យជាជនជាតិខ្មែរ ឬជនបរទេស គឺត្រូវតែយល់ដឹងអំពីបទប្បញ្ញត្តិ និងបច្ចុប្បន្នភាពច្បាប់ថ្មីៗ ដើម្បីបំពេញកាតព្វកិច្ច ក៏ដូចជាការពារអចលនទ្រព្យរបស់លោកអ្នក និងជៀសវាងការផាកពិន័យ។ 

—————————————————————————————————————— 

សារាចរណែនាំលេខ ០២៨ របស់ក្រសួងមហាផ្ទៃដែលបានចេញផ្សាយក្នុងខែកក្កដា ឆ្នាំ ២០១៩ ដែលកំណត់ឱ្យម្ចាស់លំនៅឋានទាំងអស់រាយការណ៍អំពីវត្តមានជនបរទេសដែលរស់នៅក្នុងអចលនទ្រព្យរបស់ពួកគាត់តាមរយៈប្រព័ន្ធអនឡាញឈ្មោះ FPCS (Foreigners Present in Cambodia System - ប្រព័ន្ធគ្រប់គ្រងវត្តមានជនបរទេសនៅកម្ពុជា)។ FPCS ថ្មី ស្ថិតក្រោមសារាចរណែនាំលេខ ០២៨ របស់ក្រសួងមហាផ្ទៃដែលបានចេញផ្សាយក្នុងខែកក្កដា ឆ្នាំ ២០១៩ ដែលកំណត់ឱ្យម្ចាស់លំនៅឋានទាំងអស់រាយការណ៍អំពីវត្តមានជនបរទេសដែលរស់នៅក្នុងអចលនទ្រព្យរបស់ពួកគាត់តាមរយៈប្រព័ន្ធអនឡាញឈ្មោះ FPCS (Foreigners Present in Cambodia System - ប្រព័ន្ធគ្រប់គ្រងវត្តមានជនបរទេសនៅកម្ពុជា)។

យោងតាមមាត្រាទី ១៨ នៃច្បាប់ស្តីពីអន្តោប្រវេសន៍ ដំណើរការចុះឈ្មោះត្រូវបញ្ចប់ក្នុងរយៈពេល ២៤ ម៉ោងគិតចាប់ពីថ្ងៃមកដល់របស់ជនបរទេស។ ម្ចាស់ផ្ទះត្រូវមានទំនួលខុសត្រូវក្នុងការបញ្ជូនព័ត៌មានចាំបាច់តាមរយៈកម្មវិធី FPCS ដែលត្រូវបានបង្កើតឡើងជាពិសេសដើម្បីគ្រប់គ្រងវត្តមានជនបរទេសនៅកម្ពុជា។

ទោះបីជាច្បាប់នេះត្រូវបានអនុវត្តមួយរយៈហើយក៏ដោយ ក៏ម្ចាស់អចលនទ្រព្យមួយចំនួននៅតែមិនទាន់ដឹងអំពីបទប្បញ្ញត្តិ និងមិនទាន់បានបំពេញកាតព្វកិច្ចរបស់ពួកគាត់តាមរយៈកម្មវិធី FPCS នៅឡើយទេ។ ដើម្បីយល់ច្បាស់ពីសារៈសំខាន់ក្នុងការអនុលោមតាមច្បាប់ថ្មីនេះ និងជៀសវាងផលវិបាកផ្នែកច្បាប់ សូមអានបន្តខាងក្រោមដើម្បីយល់ដឹងអំពីរបៀបប្រើប្រាស់កម្មវិធី FPCS ៖

1. ទាញយក (Download) កម្មវិធី FPCS ៖
   • បើកចូលកម្មវិធី Play Store ឬ App Store នៅលើទូរស័ព្ទរបស់លោកអ្នក ( Android និង IOS users)
   • ចុចស្វែងរកពាក្យ FPCS
   • ចុចលើកម្មវិធីហើយទាញយកដោយចុចលើពាក្យ "Download" ឬ "Install"

2. បង្កើត​គណនី ៖
   • បើកកម្មវិធី FPCS ហើយចុចលើប៊ូតុង "បង្កើតគណនី - Create an account"
   • ទំព័រមួយនឹងលេចឡើងហើយអ្នកត្រូវជ្រើសរើសការស្កេនតាមរយៈ លិខិតឆ្លងដែន ឬ អត្តសញ្ញាណប័ណ្ណ របស់អ្នក
   • បញ្ចូលព័ត៌មានទំនាក់ទំនងរបស់អ្នក (ប្រើបានតែលេខទូរស័ព្ទកម្ពុជាប៉ុណ្ណោះ) និងបង្កើតពាក្យសម្ងាត់របស់អ្នក
   • លោកអ្នកនឹងទទួលបានលេខកូដតាមរយៈសារ សូមបញ្ចូលលេខកូដនោះ រួចចុច "បញ្ជាក់ - Confirm"
   • សូមផ្ទៀងផ្ទាត់ព័ត៌មានរបស់អ្នក មុនបន្តទៅជំហានបន្ទាប់

3. ចុះបញ្ចីកន្លែងស្នាក់នៅ ឬ អចលនទ្រព្យរបស់អ្នក៖
   • បន្ទាប់ពីបង្កើតគណនីរបស់អ្នករួច សូមចូលទៅកាន់ប៊ូតុង "គណនី - Profile"
   • ចុចលើពាក្យ "បង្កើតកន្លែងស្នាក់នៅ - Create Accommodation" ដើម្បីចុះឈ្មោះអចលនទ្រព្យ ឬកន្លែងស្នាក់នៅរបស់អ្នក
   • បំពេញព័ត៌មានលម្អិតអំពីអចលនទ្រព្យរបស់អ្នក ដូចជាប្រភេទអចលនទ្រព្យ ឈ្មោះអចលនទ្រព្យ និងអាសយដ្ឋានអចលនទ្រព្យ

4. ចុះឈ្មោះជនបរទេសដែលស្នាក់នៅ៖
   បន្ទាប់​ពី​បាន​ចុះ​បញ្ជី​អចលនទ្រព្យរបស់​អ្នករួច អ្នក​អាចចុះឈ្មោះអ្នកជួល​បរទេស​បាន ដោយត្រូវការច្បាប់ចម្លងនៃលិខិតឆ្លងដែនរបស់ពួកគាត់សម្រាប់ការស្កេននៅលើកម្មវិធី
   • ទៅកាន់ទំព័រដើម (Home) ហើយចុចលើពាក្យ "ចូលស្នាក់នៅ - Check-in"
   • ទំព័រមួយនឹងលេចឡើងដែលអ្នកនឹងត្រូវស្កេនលិខិតឆ្លងដែនរបស់អ្នកជួល
   • ផ្ទៀងផ្ទាត់ព័ត៌មានលម្អិតដែលបានស្កេនពីលិខិតឆ្លងដែន
   • បំពេញកាលបរិច្ឆេទចូល កាលបរិច្ឆេទចេញ លេខបន្ទប់ កាលបរិច្ឆេទផុតកំណត់ទិដ្ឋាការរបស់ភ្ញៀវ (Visa) និងលេខទិដ្ឋាការ (Visa Number)

ទោះបីការចុះឈ្មោះនៅលើ FPCS នេះជាកាតព្វកិច្ចរបស់ម្ចាស់អចលនទ្រព្យក៏ដោយ ក៏អ្នកជួលត្រូវយល់ដឹង និងក្រើនរំលឹកដល់ម្ចាស់ផ្ទះផងដែរ ក្នុងករណីម្ចាស់ផ្ទះភ្លេចធ្វើការចុះឈ្មោះ ឬម្ចាស់ផ្ទះពុំមានការយល់ដឹងអំពីបញ្ហានេះ។

សម្រាប់ម្ចាស់អចលនទ្រព្យ៖ ការមិនគោរពតាមកាតព្វកិច្ចនេះ អាចមានលទ្ធផលដ៏ធ្ងន់ធ្ងរ។ អាជ្ញាធរ​អាច​នឹង​ចាត់​វិធាន​ការ​ផ្លូវ​ច្បាប់​ចំពោះ​ម្ចាស់​ដែល​មិន​គោរព​តាម នឹង​នាំ​ឱ្យ​មាន​ការ​ផាក​ពិន័យ​ផ្សេង​ៗ។ លើសពីនេះ រឿងនេះសំខាន់សម្រាប់ ជនបរទេស ដែលរស់នៅក្នុង អចលនទ្រព្យក្នុងប្រទេសកម្ពុជា ត្រូវដឹងថាការស្នាក់នៅរបស់ពួកគាត់អាចរងផលប៉ះពាល់ ប្រសិនបើម្ចាស់ផ្ទះខកខានមិនបានរាយការណ៍អំពីវត្តមានរបស់ពួកគាត់ ដោយសារពួកគាត់នឹងមិនអាចបន្ត ទិដ្ឋាការកម្ពុជា (Visa) ឬស្នើសុំលិខិតអនុញ្ញាតចាំបាច់ផ្សេងៗ។

ទាំងម្ចាស់ផ្ទះ និងអ្នកជួលបរទេសត្រូវយល់ដឹងអំពីសារៈសំខាន់អំពីគោលការណ៍ថ្មីនេះ ហើយត្រូវចាត់វិធានការចាំបាច់ដើម្បីការពារផលវិបាកផ្លូវច្បាប់ដែលអាចកើតមានឡើងនៅពេលអនាគត។ ទន្ទឹមនឹងនេះដែរ ជាមួយសេវាកម្មគ្រប់គ្រងអចលនទ្រព្យរបស់ IPSយើងទទួលខុសត្រូវលើកាតព្វកិច្ចនេះជំនួសម្ចាស់ផ្ទះ និងយកចិត្តទុកដាក់ជាខ្លាំងចំពោះ អចលនទ្រព្យដែលយើងគ្រប់គ្រង។.

តាមរយៈការអនុវត្តតាមគោលការណ៍នេះ លោកអ្នកមិនត្រឹមតែបំពេញកាតព្វកិច្ចក្នុងនាមជាម្ចាស់ផ្ទះប៉ុណ្ណោះទេ ប៉ុន្តែថែមទាំងជួយរួមចំណែកបង្កើតសុវត្ថិភាព និងសន្តិសុខសង្គមនៅក្នុងប្រទេសកម្ពុជាផងដែរ។

អត្ថបទនេះត្រូវបានសរសេរឡើងក្នុងគោលបំណងផ្តល់នូវព័ត៌មានតែប៉ុណ្ណោះ - យើងមិនពាក់ព័ន្ធ ឬប្រឹក្សាផ្នែកច្បាប់ឡើយ។ សម្រាប់ចម្ងល់ ឬស្វែងរកជំនួយទាក់ទងនឹងកម្មវិធី FPCS សូមធ្វើការទាក់ទងទៅកាន់ អគ្គនាយកដ្ឋានអន្តោប្រវេសន៍ ។.