ពន្លឺរបស់កម្ពុជាកាន់តែចែងចាំងទៅលើពិភពលោក៖ ភាពជោគជ័យនៃការធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាអាស៊ីអាគ្នេយ៍
ព្រឹត្តិការណ៍ប្រកួតកីឡាអាស៊ីអាគ្នេយ៍ ដែលត្រូវបានគេស្គាល់ថា ស៊ីហ្គេម (SEAGAME) ជាព្រឹត្តិការណ៍កីឡាដ៏ធំប្រមូលផ្តុំដោយអត្តពលិកមកពី ១១ ប្រទេសទូទាំងតំបន់អាស៊ីអាគ្នេយ៍។ កម្ពុជាសម្រេចបាននូវជោគជ័យជាប្រវត្តិសាស្រ្តក្នុងការធ្វើជាម្ចាស់ផ្ទះនៃព្រឹត្តិការណ៍ដ៏មានកិត្យានុភាពនេះ ដោយមិនត្រឹមតែបានបង្ហាញឱ្យពិភពលោកឃើញពីវប្បធម៌ និងប្រវត្តិសាស្រ្តដ៏លេចធ្លោរបស់អាណាចក្រខ្មែរប៉ុណ្ណោះទេ ថែមទាំងលើកមុខមាត់ និងសេដ្ឋកិច្ជជាតិទៀតផង។
ព្រឹត្តិការណ៍ស៊ីហ្គេមជះឥទ្ធិពលអ្វីខ្លះមកលើសេដ្ឋកិច្ចកម្ពុជា?
គ្រាន់តែធ្វើជាម្ចាស់ផ្ទះនៃព្រឹត្តិការណ៍ស៊ីហ្គេម កម្ពុជាអាចទាញយកផលប្រយោជន៍ជាច្រើនសម្រាប់សេដ្ឋកិច្ជជាតិ។ សណ្ឋាគារ ភោជនីយដ្ឋាន និងធុរកិច្ចក្នុងស្រុកទទួលបានអត្ថប្រយោជន៍ពីលំហូរអ្នកទស្សនា ពោលគឺមិនត្រឹមតែនាំចូលចំណូលមកក្នុងប្រទេសនៅក្នុងឱកាសការប្រកួតកីឡាដ៏ធំនេះប៉ុណ្ណោះទេ ថែមទាំងទទួលបានឱកាសលើកស្ទួយកេរ្តិ៍ឈ្មោះរបស់ជាតិ និងនាំយកចំណាប់អារម្មណ៏របស់សកលលោកមកកាន់ប្រទេសកម្ពុជាដែលអំណោយផលទៅដល់វិស័យទេសចរណ៍ និងឱកាសវិនិយោគពីក្រៅប្រទេសនាពេលអនាគតផងដែរ។
វឌ្ឍនភាពនៃហេដ្ឋារចនាសម្ព័ន្ធនៅក្នុងប្រទេសកម្ពុជា
កំឡុងពេលត្រៀមធ្វើជាម្ចាស់ផ្ទះរបស់ស៊ីហ្គេមឆ្នាំ២០២៣ យើងឃើញមានគម្រោងហេដ្ឋារចនាសម្ព័ន្ធជាច្រើនត្រូវបានសាងសង់ឡើងសម្រាប់ព្រឹត្តិការណ៍នេះដោយរួមមាន ការសាងសង់កីឡដ្ឋានថ្មី ពហុកីឡដ្ឋានជាតិមរតកតេជោ ដែលបម្រើជាទីកន្លែងដ៏សំខាន់សម្រាប់ការប្រកួត។ រាជរដ្ឋាភិបាលក៏បានវិនិយោគលើការកែលម្អប្រព័ន្ធដឹកជញ្ជូន និងបណ្តាញផ្លូវថ្នល់ ដើម្បីសម្រួលដល់ការធ្វើដំណើរថែមទៀតផង។
គម្រោងទាំងនេះចូលរួមចំណែកដល់ការអភិវឌ្ឍប្រទេសទាំងមូល ដោយទទួលបានអត្ថប្រយោជន៍រយៈពេលវែងសម្រាប់ប្រទេស។ ឧទាហរណ៍ កីឡដ្ឋានថ្មីអាចបន្តប្រើប្រាស់សម្រាប់ព្រឹត្តិការណ៍កីឡាជាតិ និងអន្តរជាតិ ការប្រគុំតន្ត្រី និងការជួបជុំពិធីធំៗផ្សេងទៀត ដែលអាចទាញយកទេសចរ និងចំណូលសម្រាប់ជាតិ។ ចំណែក ភាពប្រសើរឡើងនៃប្រព័ន្ធធ្វើដំណើរ និងដឹកជញ្ជូន អាចជួយសម្រួលយ៉ាងខ្លាំងលើវិស័យពាណិជ្ជកម្ម ទេសចរណ៍ និងចលនានាំចេញនាំចូលនៃផលិតផលដែលជាកត្តាចាំបាច់សម្រាប់កំណើនសេដ្ឋកិច្ច។
ក្រៅពីគម្រោងដែលទាក់ទងនឹងស៊ីហ្គេម កម្ពុជាក៏នៅមានការអភិវឌ្ឍជាច្រើនទៀតដែលកំពុងដំណើរការ ក៏ដូចជាគ្រោងនឹងសាងសង់សម្រាប់អនាគតផងដែរ។ ទាំងនោះរួមមានការសាងសង់ព្រលានយន្តហោះថ្មីនៅរាជធានីភ្នំពេញ និងខេត្តសៀមរាប ការពង្រីកកំពង់ផែស្វយ័តក្រុងព្រះសីហនុ និងការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុទៀតផង។
គម្រោងទាំងនេះនឹងរួមចំណែកដល់កំណើនសេដ្ឋកិច្ចរបស់ប្រទេសកម្ពុជាដោយទាក់ទាញការវិនិយោគពីបរទេស កែលម្អឱកាសពាណិជ្ជកម្ម និងលើកកម្ពស់វិស័យទេសចរណ៍ ដែលធ្វើឱ្យកម្រិតជីវភាពរស់នៅប្រសើរឡើង និងបង្កើនការប្រកួតប្រជែងទៅលើសកលលោក។
ការលូតលាស់នៃសេដ្ឋកិច្ចកម្ពុជា
ប៉ុន្មានឆ្នាំចុងក្រោយនេះ ប្រទេសកម្ពុជាទទួលបានកំណើនសេដ្ឋកិច្ចគួរឲ្យកត់សម្គាល់ ដែលមានការជំរុញពីកិច្ចខិតខំប្រឹងប្រែងរួមគ្នារបស់រដ្ឋាភិបាល និងវិស័យឯកជននានា ក្នុងការទាញយកសក្តានុពលនៃវិស័យសំខាន់ៗ និងការវិនិយោគពីបរទេស។ វិស័យចម្បងចំនួនបីដែលបានដើរតួយ៉ាងសំខាន់រួមមាន៖ វិស័យអចលនទ្រព្យ វិស័យទេសចរណ៍ និងវិស័យឧស្សាហកម្មកាត់ដេរ។
ទីផ្សារអចលនទ្រព្យមានសន្ទុះយ៉ាងខ្លាំង ដោយមានការកើនឡើងនៃអត្រាទេសចរ និងការវិនិយោគពីបរទេស ជាមួយគម្រោងអភិវឌ្ឍខុនដូប្រណីតៗ អគារការិយាល័យ និងពាណិជ្ជកម្មនៅក្នុងទីក្រុង ជាពិសេសនៅក្នុងរាជធានីភ្នំពេញ។ ចំណែកវិស័យទេសចរណ៍ក៏នៅតែបន្តទាក់ទាញភ្ញៀវទេសចររាប់លាននាក់ពីមួយឆ្នាំទៅមួយឆ្នាំ ជាមួយវប្បធម៌ដ៏រុងរឿង បេតិកភណ្ឌជាតិ និងសម្រស់ធម្មជាតិដ៏លេចធ្លោរបស់កម្ពុជា។ រីឯវិស័យកាត់ដេរផលិតសម្លៀកបំពាក់ ក៏ឃើញមានការនាំចេញក្រៅប្រទេសយ៉ាងមមាញឹកផងដែរ។
សរុបមក ការធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាអាស៊ីអាគ្នេយ៍ ដែលហៅកាត់ថា ស៊ីហ្គេម ពិតជាធ្វើឱ្យពិភពលោកបានស្គាល់កម្ពុជាកាន់តែច្បាស់ជាមួយនឹងភាពអស្ចារ្យនៃរប្បធម៌របស់អាណាចក្រខ្មែរដែលជាចំណែកដ៏ធំក្នុងការលើកតម្កើងមុខមាត់ និងកេរ្តិ៍ឈ្មោះជាតិ ហើយបាននាំយកនូវឱកាសទាក់ទាញទេសចរ និងវិនិយោគិនក្រៅប្រទេសដែលផ្តល់នូវផលប្រយោជន៍ដល់ប្រទេសជាតិជាយូរអង្វែងទៅថ្ងៃអនាគត។
- 1
- 2
EN