គុណសម្បត្តិ និងគុណវិបត្តិ នៃការទិញខុនដូដែលមិនមានគ្រឿងសង្ហារិម
ប្រសិនបើលោកអ្នកទិញខុនដូ តើអ្នកនឹងពិចារណាទិញខុនដូទទេដែរឬទេ? ការទិញខុនដូទទេអាចនឹងល្អម្យ៉ាងដែរ ជាពិសេសសម្រាប់អ្នកដែលចូលចិត្តរៀបចំកន្លែងរស់នៅដោយខ្លួនឯង។ អចលនទ្រព្យប្រភេទនេះអាចមានគុណសម្បត្តិជាច្រើន តែក៏មានគុណវិបត្តិមួយចំនួនដែលអ្នកគួរពិចារណាផងដែរ។
គុណសម្បត្តិ
ផ្តល់នូវសេរីភាពក្នុងការរៀបចំ
អត្ថប្រយោជន៍ដ៏សំខាន់បំផុតមួយនៃការទិញខុនដូដែលមិនមានសម្ភារគឺលោកអ្នកនឹងមានសេរីភាពក្នុងការជ្រើសរើស និងរៀបចំគ្រឿងសង្ហារិម ក៏ដូចជាសម្ភារប្រើប្រាស់ដោយខ្លួនឯង ហើយថែមទាំងអាចលាបពណ៌ថ្មីទៅតាមចំណូលចិត្ត និងរសនិយមរបស់អ្នកបានទៀតផង។
កាត់បន្ថយការចំណាយ
ប្រសិនបើលោកអ្នកចង់ទិញខុនដូតែមិនចង់ចំណាយច្រើន ការទិញខុនដូទទេមិនមានសង្ហារិមជាចំណែកមួយដែលអាចកាត់បន្ថយថវិការបស់អ្នក។ ខុនដូប្រភេទនេះភាគច្រើនដាក់លក់ជាមួយនឹងតម្លៃទាប ដែលធ្វើឲ្យវាក្លាយជាជម្រើសដ៏គួរឱ្យទាក់ទាញមួយនៅលើទីផ្សារលំនៅឋាននាពេលបច្ចុប្បន្ននេះ។ ជាមួយនឹងប្រាក់ដែលអ្នកបានសន្សំពីតម្លៃទិញ អ្នកអាចយកទៅចំណាយលើគ្រឿងសង្ហារិមដែលមានតម្លៃសមរម្យ និងសក្តិសមសម្រាប់តម្រូវការរបស់អ្នក។
អាចជួសជុលកែលម្អបាន
ខុនដូប្រភេទនេះជាជម្រើសដ៏ល្អសម្រាប់លោកអ្នកដែលមានគំនិតច្នៃប្រឌិត ចង់កែលម្អរចនាសម្ព័ន្ធ បន្ថែមភាពទាក់ទាញឱ្យផ្ទះដោយខ្លួនឯង។ លោកអ្នកអាចកែប្រែទម្រង់របស់ខុនដូប្រភេទនេះឱ្យសមស្របតាមរបៀបរស់នៅ និងតម្រូវការរបស់លោកអ្នកបាន។ ឧទាហរណ៍ អាចវាយទម្លុះជញ្ជាំងពីបន្ទប់មួយទៅមួយឱ្យមានលក្ខណៈទូលាយជាងមុន ឬ បន្ថែមបន្ទប់/យ៉/រានហាលជាដើម។
គុណវិបត្តិ
ផលវិបាកនៃការរចនា និងសាងសង់
បញ្ហាប្រឈមចម្បងមួយនៃការទិញខុនដូទទេគឺការទទួលបន្ទុកលើការរចនា និងសាងសង់ដោយខ្លួនឯង។ នេះអាចជារឿងដែលលំបាក ជាពិសេសប្រសិនបើអ្នកមិនមានបទពិសោធន៍ក្នុងការសាងសង់ ឬរចនាផ្ទះ។ ដំណោះស្រាយនៃបញ្ហានេះគឺស្វែងរកអ្នកជំនាញមកជួយដល់លោកអ្នកដើម្បីឱ្យប្រាកដថាកន្លែងនីមួយៗត្រូវបានសាងសង់យ៉ាងត្រឹមត្រូវ។
អាចនឹងត្រូវចំណាយលើសកំណត់ និងប្រើប្រាស់ពេលច្រើន
ជារឿងទូទៅទៅហើយ ការទិញខុនដូដែលមិនមានសម្ភារ និងសង្ហារិមគឺពន្យាពេលការចូលស្នាក់នៅរបស់លោកអ្នកព្រោះអ្នកត្រូវចំណាយពេលក្នុងការរៀបចំ។ មួយវិញទៀត ការរៀបចំកន្លែងរស់នៅរបស់អ្នកទៅតាមបំណង និងតម្រូវការជារឿងដ៏ល្អ តែប្រសិនបើមិនបានគិតគូរឱ្យបានដិតដល់អ្នកអាចប្រឈមនឹងបញ្ហាចំណាយលើសការកំណត់។
ផលវិបាកផ្នែកហិរញ្ញវត្ថុ
ការផ្តល់ហិរញ្ញប្បទានខុនដូទទេអាចប្រឈមនឹងបញ្ហាជាងខុនដូដែលបានរៀបចំរួចជាស្រេច។ ខាងកម្ចីប្រាក់អាចស្ទាក់ស្ទើរក្នុងការផ្តល់ហិរញ្ញប្បទានសម្រាប់អចលនទ្រព្យដែលមានលក្ខណៈមិនទាន់ពេញលេញ។ ដំណោះស្រាយសម្រាប់បញ្ហានេះគឺស្វែងរកមធ្យោបាយហិរញ្ញប្បទានផ្សេងៗ និងការណែនាំពីអ្នកជំនាញដើម្បីធានាបាននូវដំណើរការហិរញ្ញប្បទានប្រកបដោយជោគជ័យ និងគ្មានការរំខាន។
អាចប្រឈមនឹងបញ្ហាក្នុងការលក់បន្ត
ធម្មតា ខុនដូដែលបានឆ្លងកាត់ការជួសជុលអាចចំណាយពេលយូរដើម្បីលក់។ ដូចនេះប្រសិនបើអ្នកមានគម្រោងលក់ សូមត្រៀមខ្លួនសម្រាប់ករណីនេះដោយពិចារណាឱ្យបានហ្មត់ចត់ទៅលើទីផ្សារអចលនទ្រព្យក្នុងស្រុក ឬពិគ្រោះជាមួយភ្នាក់ងារអាយភីអេសដើម្បីយល់ដឹងពីផលប៉ះពាល់លើតម្លៃលក់បន្ត និងលទ្ធភាពទីផ្សារ។
ការទិញខុនដូដែលមិនមានគ្រឿងសង្ហារិមគឺមានទាំងគុណសម្បត្តិ និងគុណវិបត្តិ។ ដូចនេះលោកអ្នកត្រូវពិចារណា និងថ្លឹងថ្លែងលើកត្តាទាំងនេះឱ្យបានហ្មត់ចត់ដើម្បីធ្វើការសម្រេចចិត្តប្រកបដោយការយល់ដឹងហើយសមស្របនឹងរបៀបរស់នៅ ថវិកា និងគោលដៅរបស់លោកអ្នក។
- 1
- 2
KH