អ្វីដែលអ្នកគួរយល់ដឹងអំពី “តំបន់អប្សរា”

អ្វីទៅជាតំបន់អប្សរា?

តំបន់អប្សរា ឬជាទូទៅត្រូវបានគេហៅថា ដីអប្សរា ជាដីរដ្ឋដែលស្ថិតនៅក្នុងតំបន់ការពារដូចជា តំបន់រមណីយដ្ឋានអង្គរ ឬ តំបន់បុរាណដ្ឋាននានាក្រោមការគ្រប់គ្រងរបស់អាជ្ញាធរជាតិអប្សរា។ ដីនេះត្រូវបានហាមឃាត់មិនឱ្យមានការទិញ លក់ ឬសាងសង់សំណង់អ្វីដាច់ខាត លើកលែងករណីមួយចំនួន។

អាជ្ញាធរជាតិអប្សរាអំពាវនាវដល់បុគ្គលដែលកំពុងតែប្រព្រឹត្តសកម្មភាពទិញ-លក់ដីនៅក្នុងតំបន់រមណីយដ្ឋានអង្គរឱ្យបញ្ឈប់ជាបន្ទាន់ ដោយប្រកាសថា ការលក់ដូរដីធ្លីនេះផ្ទុយនឹងច្បាប់ ដូចមានចែងក្នុងព្រះរាជក្រឹត្យលេខ០០១ ន.ស ចុះថ្ងៃទី២៨ ខែឧសភា ឆ្នាំ១៩៩៤ ស្តីពីការកំណត់ និងការចាត់ចែងគ្រប់គ្រងតំបន់សៀមរាបអង្គរ និងសេចក្តីសម្រេចលេខ៧០ សសរ ចុះថ្ងៃទី១៦ ខែវិច្ឆិកា ឆ្នាំ២០០៤ របស់រាជរដ្ឋាភិបាលស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២។

អាជ្ញាធរជាតិអប្សរាជាអ្វី?

អាជ្ញាធរជាតិអប្សរា ជាគ្រឹះស្ថានសាធារណៈមួយដែលបង្កើតឡើងដើម្បីការពាររមណីយដ្ឋាន និងរៀបចំតំបន់អង្គរ ដែលសម្បូរទៅដោយបេតិកភណ្ឌដ៏សន្ធឹកសន្ធាប់ ។

មូលហេតុដែលយើងមិនគួរទិញដីនៅតំបន់អប្សរា

• មិនមានការគាំទ្រដោយច្បាប់
• មានហានិភ័យខ្ពស់ពីការដកហូតពីអាជ្ញាធរអប្សរា
• មិនមានវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង)
• មិនអាចដាក់បញ្ចាំ ឬ ដាក់បន្ទុក
• មិនមានសិទ្ធិពេញលេញទៅលើដី (ពុំអាចសាងសង់អ្វីតាមចិត្តបានឡើយ)

ផែនទីតំបន់អប្សរា

យោងតាមជំពូក១ មាត្រា៣ និងមាត្រា៤ នៃព្រះរាជក្រឹត្យបញ្ជាក់ថា តំបន់១ ជាតំបន់ដែលមានស្ថានីយ៍បុរាណវត្ថុសំខាន់ៗហើយត្រូវទទួលកិច្ចការពារខ្ពស់បំផុត។ តំបន់២ ជាតំបន់ដែលសម្បូរសំណល់បុរាណវត្ថុ ដែលត្រូវការពារទប់ទល់នឹងការប្រើប្រាស់ដីធ្លីផ្តេសផ្តាស និងការអភិវឌ្ឍមិនសមស្រប។ តំបន់២ មានសារៈសំខាន់ចម្បងដោយសារជាតំបន់ទ្រនាប់សម្រាប់ការពារតំបន់១។ ចំណែកជំពូក២ មាត្រា៨បញ្ជាក់ថា ទិសដៅសម្រាប់តំបន់ត្រូវការពារនៃរមណីយដ្ឋានអង្គរ ត្រូវប្រកាន់ទិសដៅអភិវឌ្ឍន៍ដូចតទៅ៖ តំបន់១ និងតំបន់២ ហាមឃាត់ការអភិវឌ្ឍក្នុងរមណីយដ្ឋានមានប្រាសាទ លើកលែងតែការអភិវឌ្ឍណាដែលមានសារប្រយោជន៍សម្រាប់សម្រាប់ការថែរក្សារបៀបរស់នៅរបស់មនុស្សនៅតំបន់នោះ ឬ សម្រាប់កិច្ចការពារ លើកស្ទួយតម្លៃរមណីយដ្ឋាន និងបុរាណវត្ថុ។

វិធីជៀសវាងការទិញប៉ះចំដីអប្សរា

ប្រសិនបើអ្នកមិនច្បាស់ថាដីដែលអ្នកចង់ទិញជាដីអប្សរាឬអត់ អ្នកអាចពិនិត្យលើស្ថានភាពមូលដ្ឋានចំនួន ៤ ចំណុចដូចខាងក្រោម៖

១. ពិនិត្យនៅក្នុងផែនទី

២. ពិនិត្យប្លង់កម្មសិទ្ធ

ដីអប្សរាមិនមានប្លង់រឹងដូចដីធម្មតាទេ ព្រោះរដ្ឋហាមឃាត់មិនឱ្យមានការចុះបញ្ជីដោយរដ្ឋបាលសុរិយោដី។ សម្រាប់ដីខ្លះមានប្លង់ទន់ដែលម្ចាស់ដីគ្រាន់តែជាអ្នកកាន់កាប់ស្របច្បាប់ ដោយមានសិទ្ធិត្រឹមរស់នៅ និងប្រើប្រាស់ប៉ុណ្ណោះ ។

៣. ពិនិត្យស្ថានភាពដី

ជាទូទៅ ដីអប្សរាតែងមានលំនៅឋានលក្ខណៈតូចៗ ពោលគឺពុំមានអគារខ្ពស់ៗ ឬសំណង់អគារធំៗបែបអាជីវកម្មឡើយ។ ជុំវិញដីតែងមានប្រាសាទ ត្រពាំងបុរាណ តួប្រាសាទ ឬគោកបុរាណជាដើម។ មួយទៀត អ្នកអាចជិះមើលជុំវិញដីនោះថាមានបង្គោលព្រំសីមារបស់អាជ្ញាធរអប្សរាឬទេ ព្រោះធម្មតា ក្នុងតំបន់ការពារតែងមានបង្គោលព្រំសីមា។

៤. ទាក់ទងជាមួយអាជ្ញាធរមូលដ្ឋាន

ករណីខ្លះមានលក្ខណៈស្មុគស្មាញ៖ ដីអប្សរាមួយប្លង់អាចមានដីមួយភាគជាប្រភេទដីធម្មតា (មានប្លង់រឹងត្រឹមត្រូវ) ដែលមានម្ចាស់តែម្នាក់ជាអ្នកកាន់កាប់។ ដូចនេះ ម្ចាស់អាចបន្លំថាដីនោះជាប្រភេទដីធម្មតានៅពេលលក់។
ប្រសិនបើលោកអ្នកនៅតែស្ទាក់ស្ទើរ អ្នកត្រូវសាកសួរមន្ត្រីភូមិឃុំ ឬទំនាក់ទំនងទៅកាន់មន្ទីរសុរិយោដី ឬអាជ្ញាធរជាតិអប្សរាដែលដីនោះស្ថិតនៅ ដើម្បីសុំការបំភ្លឺពីស្ថានភាពដីនោះ។

ចំណុចខាងលើនេះគ្រាន់តែជាជំនួយមូលដ្ឋានក្នុងការពិចារណាប៉ុណ្ណោះ – ជាទូទៅ ដើម្បីបញ្ជៀសបញ្ហានៅពេលទិញដី អ្នកក៏ត្រូវពិនិត្យមើលចំណុចផ្សេងៗទៀតផងដែរ ហើយសំខាន់បំផុតត្រូវសួរយោបល់ពីអាជ្ញាធរមានសមត្ថកិច្ចដើម្បីទទួលបានលទ្ធផលដែលមានភាពជាក់លាក់ ។