ធនាគារជាតិនៃកម្ពុជា៖ យន្តការបន្ទាន់សម្រាប់អនុវត្តនៅខេត្តសៀមរាប
យោងតាមសេចក្តីប្រកាសព័ត៌មានរបស់ធនាគារជាតិនៃកម្ពុជាស្តីពីកិច្ចប្រជុំពិភាក្សាលើការសម្របសម្រួលចរាចរណ៍ក្រដាសប្រាក់ដុល្លាអាមេរិកជាមួយគ្រឹះស្ថានធនាគារ និងហិរញ្ញវត្ថុ នៅខេត្តសៀមរាប កាលពីថ្ងៃទី២១ កក្កដា ឆ្នាំ២០២៤ ធនាគារជាតិនៃកម្ពុជាបានដាក់ចេញនូវយន្តការបន្ទាន់ដើម្បីជួយសម្រួលដល់ចរាចរណ៍ក្រដាសប្រាក់ដុល្លារអាមេរិកដែលមានសភាពចាស់ ឬប្រឡាក់ ក៏ដូចជាជួយសម្រួលដល់ការចាយវាយរបស់ភ្ញៀវទេសចរនៅក្នុងខេត្តសៀមរាប។ យន្តការបន្ទាន់ទាំង៤ (បួន) រួមមាន៖
- ១. តម្រូវឱ្យសាខាធនាគារពាណិជ្ជខេត្តសៀមរាប ទទួលយកប្រាក់ដុល្លារអាមេរិកចាស់ ឬប្រឡាក់ដោយមិនទាមទារកម្រៃសេវាពីអតិថិជនរបស់ខ្លួន លើកលែងតែក្រដាសនោះជាប្រាក់ក្លែងក្លាយ។
- ២. ក្នុងករណីក្រដាសប្រាក់ដុល្លារចាស់ខ្លាំងដែលគិតថាមិនគួរបន្តឱ្យចរាចរនៅលើទីផ្សារបាន ធនាគារពាណិជ្ជនៅក្នុងខេត្តសៀមរាបត្រូវបញ្ជូនបន្តទៅប្តូរយកក្រដាសប្រាក់ថ្មីនៅសាខាធនាគារជាតិខេត្តសៀមរាប ដោយពុំមានគិតកម្រៃសេវា និងពុំចាំបាច់រងចាំផ្ញើទៅទីស្នាក់ការកណ្តាលរបស់ធនាគារពាណិជ្ជនៅរាជធានីភ្នំពេញនោះទេ។
- ៣. តម្រូវឱ្យគ្រឹះស្ថានធនាគារនិងហិរញ្ញវត្ថុទាំងអស់នៅខេត្តសៀមរាបដាក់ក្រដាសប្រាក់ដុល្លារអាមេរិកប្រភេទ ២០ដុល្លារអាមេរិក និង៥០ដុល្លារអាមេរិក ជំនួសក្រដាក់ប្រាក់ដុល្លារអាមេរិកប្រភេទ ១០០ ដុល្លារអាមេរិក នៅក្នុងម៉ាស៊ីនដកប្រាក់ (ATMs) ដើម្បីសម្រួលដល់ការចាយវាយរបស់ភ្ញៀវទេសចរ។
- ៤. រៀបចំផ្សព្វផ្សាយទៅកាន់អាជីវករប្តូរប្រាក់ ម្ចាស់សណ្ឋាគារនិងភោជនីយដ្ឋាន ដើម្បីឱ្យបានយល់កាន់តែច្បាស់និងគាំទ្រចំពោះវិធានការដែលបានដាក់ចេញខាងលើ និងត្រៀមសហការជាមួយធនាគារជាតិនៃកម្ពុជាក្នុងការអនុវត្តយន្តការបន្តទៀត។
ធនាគារជាតិនៃកម្ពុជា៖ យន្តការបន្តសម្រាប់អនុវត្តនៅខេត្តសៀមរាប
ក្នុងគោលបំណងដើម្បីជំរុញកំណើនទេសចរក្នុងខេត្តសៀមរាប ធនាគារជាតិនៃកម្ពុជាក៏បានដាក់ចេញនូវវិធានការបន្តចំនួន០២ (ពីរ) ជាអាទិ៍៖
- ១. ជំរុញការប្រើប្រាស់កម្មវិធីទូរស័ព្ទ Bakong Tourist App ដើម្បីគាំទ្រវិស័យទេសចរណ៍នៅកម្ពុជា តាមរយៈការជួយសម្រួលដល់ការទូទាត់របស់ភ្ញៀវទេសចរអន្តរជាតិដែលអញ្ជើញមកកម្សាន្តនៅប្រទេសកម្ពុជា។
- ២. សហការជាមួយក្រុមហ៊ុនលក់ម៉ាស៊ីនរាប់ស្រាល់ជ្រើសដើម្បីកំណត់លក្ខខណ្ឌស្តង់ដារមួយ ដែលមានសង្គតិភាពរវាងម៉ាស៊ីនរាប់ស្រាល់ជ្រើសរបស់ធនាគារជាតិនិងធនាគារពាណិជ្ជ ក៏ដូចជារវាងម៉ាស៊ីនរបស់ធនាគារពាណិជ្ជនិងធនាគារពាណិជ្ជ។
នាយករដ្ឋមន្ត្រីនៃព្រះរាជាណាចក្រកម្ពុជា៖ សារណែនាំទៅកាន់ធនាគារជាតិនៃកម្ពុជា
គួរបញ្ជាក់ផងដែរថា ការដាក់ចេញយន្តការបន្ទាន់និងយន្តការបន្តខាងលើនេះ ធ្វើឡើងឆ្លើយតបនឹងការណែនាំពីសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានណែនាំឱ្យធនាគារជាតិនៃកម្ពុជាឱ្យពិភាក្សាជាមួយគ្រឹះស្ថានធនាគារ និងហិរញ្ញវត្ថុលើការបន្ធូរបន្ថយលក្ខខណ្ឌលើការចាយវាយក្រដាសប្រាក់ដុល្លារ ដែលមានសភាពចាស់ ឬប្រឡាក់បន្ទាប់ពីទស្សនកិច្ចផ្ទាល់របស់សម្តេចធិបតីនៅ Pub Street ក្រុងសៀមរាប កាលពីថ្ងៃទី១៧ ខែកក្កដា ឆ្នាំ២០២៤ កន្លងមកនេះ។ ការណែនាំនេះ ក្នុងគោលបំណងដោះស្រាយបញ្ហាដើម្បីទាក់ទាញភ្ញៀវទេសចរក្នុងខេត្តសៀមរាប។
ទន្ទឹមនឹងការដាក់ចេញយន្តការរបស់ធនាគារជាតិនៃកម្ពុជា, សម្តេចធិបតីកាលពីថ្ងៃទី២២ ខែកក្កដា ឆ្នាំ២០២៤ ក៏បានជំរុញឱ្យបណ្ដាធនាគារឯកជន ក៏ដូចជាអាជីវកម្មឯកជន និងប្រជាពលរដ្ឋអ្នកលក់ដូរទាំងអស់នៅក្នុងខេត្តសៀមរាបចូលរួមអនុវត្តនូវគោលការណ៍ថ្មីរបស់ធនាគារជាតិឱ្យបានស្រុះគ្នា ដើម្បីកុំឱ្យមានបញ្ហាពាក់ព័ន្ធនឹងការចាយក្រដាសប្រាក់ដុល្លារ ដែលមានសភាពចាស់ ឬប្រឡាក់បន្តទៀត។ សម្តេចធិបតី សង្ឃឹមជឿជាក់ថា ចំណាត់ការរបស់ធនាគារជាតិដែលបានដាក់ចេញនេះ នឹងលុបបំបាត់បញ្ហាលំបាកពាក់ព័ន្ធនឹងការចាយក្រដាសប្រាក់ដុល្លារអាមេរិក និងជួយសម្រួលដល់ការលក់ដូររបស់ប្រជាពលរដ្ឋ ក៏ដូចជាអ្នកទេសចរដែលមកកម្សាន្តនៅខេត្តសៀមរាបផងដែរ៕
—
Sources:
Official Announcement Document from National Bank of Cambodia
Prime Minister Hun Manet Official Social Media Announcement
https://www.cpp.org.kh/en/details/378612
